Pagbungad pa lang ng unang buwan ng taong 2007, kaliwa’t kanan na ang pagpaslang sa mga aktibista, kasapi at simpatisador ng mga militanteng organisasyon at progresibong partylist na Bayan Muna sa rehiyong Bikol.

Matapos ideklara ng gobyernong Arroyo ang Oplan Bantay Laya 2 noong Disyembre 19, 2006, siyam (9) agad ang pinaslang ng AFP-PNP-CAFGU sa mga lalawigan ng Sorsogon at Albay. Una naging biktima ng pagpaslang si Efren Bantog Municipal Coordinator ng Bayan Muna sa Bayan ng Donsol. Sumunod si Rodolfo Alvarado Jr, ang ika-anim na nominado at Regional Project Officer ng Partidong Bayan Muna.

Ngayon buwan, pito (7) ang biktima ng pamamaslang gamit ang mga bayarang death squad militar. Si Efren Llona, magsasaka ng Brgy. Dinapa, Castilla Sorsogon ay kinuha sa kanilang bahay noong Enero 7, at nakuha ang bangkay nito noong Enero 10 sa Brgy. San Isidro, Castilla, Sorosogon. Bakas sa kanyang katawan ang tortyur at iba pang pagpapahirap. Kahapon Enero 23, isinunod si Kagawad Charlie Mirandilla, isang magsasaka, binaril habang nasa kanyang taniman dakong alas-10:30 ng umaga sa Brgy. San Vicente, Castilla, Sorsogon. Nagtangka sana itong tumakbo subalit inabutan ng mga elemento ng death squad lulan ng DT motorbike. Bandang tanghali naman, binaril ng dalawang armadong nakasakay ng motorsiklo si Ruben Ermino, tricycle driver sa Brgy. Tabi, Gubat, Sorsogon. Kinilala ng mga nakasaksi ang isang salarin sa bansag na “Babalu”, isang ahente ng Military Intelligence Group (MIG) na nakadestino sa bayan ng Gubat.

Tinadtad naman ng bala ng mga armadong nakabonet si Demetrio Imperial, 26 taong gulang habang naghahapunan sa harap ng kanyang asawa at isang taong gulang na anak. Naganap ang pangyayari sa Brgy. Sogoy, Castilla, Sorsogon.

Bago nito, binaril hanggang sa mapatay ng death squad ng militar si Brgy. Kapitan Ananias Burce ng Brgy. Oras, Tabaco City noong araw ng linggo bandang tanghali ng Enero 21. Sumunod na araw, natagpuan patay sa Brgy. Sabluyon, Ligao City si Julio Camero isang driver, na taga Ligao City na diumano ay kasama ng kinilalang Miguel Dayandante na natagpuan rin patay kasama ni Camero.

Ang sunod sunod na pagpatay ay nakabalangkas sa ipinapatupad na programang anti-insuhensiya ng Gobyernong Arroyo sa ilalim ng Oplan Bantay Laya 2. Subalit bigo ang mga rehimen sa mga nauna nitong mga Oplan tulad ng Oplan Lambat Bitag, Oplan Makabayan at Oplan Bantay Laya I. Mananatiling matatag at palaban ang mamamayang Bikolano upang labanan ang iba’t-ibang anyo ng paglabag sa karapatan pantao.

Hinahamon ng KARAPATAN-BIKOL ang Gobyernong Arroyo, kasama na ang kanyang armadong pwersa, (AFP-PNP) at iba pang ahensya ng gobyerno lalo na ang Commission on Human Rights (CHR) na seryosong magsagawa ng imbestigasyon para sa mabilis na paglutas ng mga kasong pagpatay sa rehiyon. Ayon sa talaan ng Karapatan Bikol umaabot na sa 137 ang pinatay, simula ng maluklok si Gng. Arroyo noong 2001 hanggang sa kasalukuyan. #

Sanggunian:

John Concepcion, Tagapagsalita KARAPATAN-BIKOL
email: karapatanbikol@yahoo.com