Press Release February 16, 2007

Kagabi Pebrero 15, bandang alas 9:45 pinaslang si Farly Alcantara II, 22 taong gulang sa labas ng kanilang paaralan sa Camarines Norte State College, sa Bayan ng Daet, nagtamo siya ng limang tama ng bala sa kanyang kaliwang sentido at namatay sa mismong pinangyarihan ng krimen. Si Alcantara ay dating tagapagsalita ng League of Filipino Students sa Camarines Norte at dating opisyal ng konseho ng nasabing kolehiyo. Siya ay magtatapos na sana ng kanyang kursong Business Administration major in Economics ngayong taon.Si Alcantara ang ika-apat na kabataang biktima ng pampulitikang pamamaslang sa Bicol.

Pagkatapos ng araw ng mga puso heto at mayroong nakakapangilabot na regalo sa mga kabataan si Ginang Gloria Macapagal Arroyo. Hindi makayang tugunan ng pamahalaan ang mga lehitimong kahilingan ng mga kabataan kaya’t ang tanging rekurso nila ay maghasik ng pasismo at terorismo.

“Hindi pa man nabibigyang linaw ang pagpalang sa tatlong lider estudyante may panibago na namang desperadong aksyon ang administrasyon upang takutin at patahimikin ang mga kabataan na ang tanging hinahangad lamang ay magkaroon ng tunay na reporma sa edukasyon”, pahayag ni Emmanuel Gutierrez, panrehiyong tagapag-ugnay ng League of Filipino Students sa Bicol. Dagdag pa ni Gutierrez, “mariing kinukondena ng kanilang hanay ang pamamaslang na ito at patuloy nilang ipapanawagan ang paghingi ng katarungan at hindi sila patatakot at itutuloy ang makabuluhang laban na inumpisahan ng mga martir na kabataan.”

“Sagad-sagaran na ang paglalapastangan ng administrasyon at ng mga berdugong militar sa karapatan ng mga kabataan at mamamayan sa Bicol”, pahayag ni Marites Lopez tagapagbuo ng ANDHRM. “Ang ganitong aksyon ng administrasyon ay malinaw na nagpapakita lamang ng takot sa lumalawak na hanay ng mga kabataang nagnanais na matanggal sa posisyon ang pasistang si Gloria Macapagal Arroyo”, ayon pa kay Lopez.

“Ang buong hanay ng mga kabataan at kabataang estudyante ay buong tapang at lakas na kikilos upang kondenahin ang pamamaslang na ito sa isa na namang lider estudyante hindi kami titigil hanggat hindi nanagot ang pamahalaang Arroyo sa mga pamamaslang na ito sa aming hanay”, dagdag pa ni Lopez.

“Lalo pa naming paiigtingin ang aming mga pagkilos at patuloy naming palalawakin ang aming hanay upang wakasan ang terorismong ito ng estado”, pagtatapos ni Gutierrez. ###

Reference: Emmanuel Gutierrez, LFS-Bicol

ANDHRM ACT NOW TO DEFEND HUMAN RIGHTS AND MORALITY
c/o Bicol University, University Student Council